di Piero Maroni  

CVEI DE' GHÈT DLA VELAGRAPA
(QUELLI DEL GHETTO DELLA VILLAGRAPPA)

La pròima caèsa dri la fòsa (1)

La pròima caèsa drì la fòsa 'd qua dla straèda, l'era quèla de' Gòb d'j Ambrusini, la fameja dla mi ma e leu l'era e' su ba.

Int cla casaza si meur tot scuzlé e carpé, l'era naseu sì fiul, trì mas-ci e trè femni, e' pròim, Gino, i l'avòiva mand par garzòun cvant ch'l'avòiva sì-sèt an da un zei cuntadòin, parché la miseria la j era 'na masa e i fiul trop, daèi da magné ma tot un s' j e la feva.

E paset acsè la su gioventò da un padròun a clèlt fena a chè un ciapet e' pòst d'un zei ch'u s'era stof 'd cla voita e l'avòiva deciois 'd cambié imstir, 't un fundarnòin sòta padròun int una caèsa cuntadòina sal culòini sòura Muntien.

A cvè e ciapet mòi, l'avet tri fiul e una voita da cuntantaès, fena a ché un malaz 't la gòula un se purtet vì. A doila tota u n'è che mè e leu as fosmi vest da spès, cvant ch'l'avet e' modi 'd vòi un pèz 'd tèra da lavuraè e un stròunch 'd caèsa da staè, mè a s'era un burdèl da fat e leu e steva dalongh, a m'arcord, cmè 't un insogni, d'una volta snò che i mi im purtet a truvaèl, mo sa chè ch'a j andesmi, propri an l'ò intlamòint.

Vesta d'in faza, la caèsa dla Velagrapa e paròiva 'na  vècia cisa d campagna, u j era un finistròin tònd sòura la porta laèrga e sgangaraèda, i du spoigual de' meur i s'incuntraèva in peunta d'inaèlt, u j a mancaèva snò la cròusa e e' campanoil dacaènt.

I mi zei im racuntaèva che una volta, cvant che lòu j era burdel, 't la cusòina i su j avòiva mes sò una butòiga 'd ròbi da magné, mo la n'à duré.

“I vandòiva ènca al caramèli?”. Ai dmandaèva curiòus.

“Caramèli, ciculaèta, zucaròin, pastòini 'd zocar 'd orz...!”.

“Òrca, e parchè l'an gn'è piò?”.

“Amo, ui batòiva e' sòul e acsè u s'è s-ciolt incvèl!”.

E' fat vèra l'è che snò e' mi nòn, e' Gòb, e savòiva lez e scroiv int cla caèsa, mo leu l'andeva a lavuraè a ovra int la campagna a la vajeun, duvò ch'us truvaèva da putòi faè cvaèlch pecc, ma caèsa e vanzaèva la mi nòna Deina si burdel znin ch'i n'era 'd niseun aieut, ènzi, la i cnòiva badaè sinò j andeva datònda mal caramèli e i s'impinoiva al bazcòzi.

Lì l'an savòiva faè i cheunt e né lèz e scroiv, e par di piò l'an s'arcurdaèva mai 'd coi ch'u j avòiva det:

“Sgné Deina, che adès i suld an gn'ò drì, a vi port admaèn cvant ch'arpas!”.

E ui n'era ch'in s'feva gnenca piò vdòi e lì l'an s'arcurdaèva 'd coi ch'l'era vneu a faè spòisa e da coi ch'la j avòiva da scod i suld.

La j era invezi braèva a castraè i galet, cvant ch'l' j andeva da Ginghin a faè i capeun, l'am tulòiva sempra drì e pròima d'avnois a caèsa l'am deva da magné i fasul e al crèsti ch'la j avòiva tajé ma chi por galet e ch'la j avòiva còt in omid, parsuaèsa che acsè mè a saria carseu fort e rubost e na cmè che su por maroid, che da burdèl l'avòiva veu al fantiglioli ch'agl'j avòiva lasé una brota gòba s'la scòina e cla gòba l'era dvent e' soranum che la zenta d'alòura i j avòiva tacaè, da chi dè in t pardunaèva s't'avivi un difèt, acsè e' Gòb e dvantet e' su num fena ch'l'avet voita a campaè, us ciamaèva Zvan, mo i s'lera scord guasi tot.

(Continua)

La prima casa vicino alla fossa (1)

La prima casa vicino alla fossa di qua dalla strada, era quella del Gobbo degli Ambrosini, la famiglia di mia mamma e lui era suo babbo.

In quella casa coi muri scrostati e crepati, erano nati sei figli, tre maschi e tre femmine, Gino, il primogenito, l'avevano mandato per garzone all'età di sei-sette anni da uno zio contadino perché la povertà era tanta e i figli troppi, nutrirli tutti era estremamente complicato.

Trascorse la sua gioventù da un padrone all'altro finché non subentrò come mezzadro in una casa colonica sulle colline dalle parti di Montiano ad uno zio che stanco di quella vita, aveva deciso di cambiare mestiere. Qui prese moglie, ebbe tre figli e una vita felice finché un maligno tumore alla gola non se lo portò via.

A dirla tutta, non è che io e lui ci fossimo visti frequentemente, quando ebbe possibilità di avere un pezzo di terra da lavorare e una povera casa da abitare, io ero un bambino piccolo e lui risiedeva lontano, ricordo, come in un sogno, di una volta sola che i miei genitori mi portarono a trovarlo, ma con quale mezzo ci arrivammo, proprio non l'ho in mente.

Vista di fronte, la casa della Villagrappa, sembrava una vecchia chiesa di campagna, c'era un finestrino rotondo simile ad un rosone sopra la porta larga e sgangherata, i due spigoli laterali si incontravano a formare una punta in alto, ci mancava solo una croce al centro e il campanile accanto.

I miei zii mi raccontavano che una volta, quando loro erano bambini, i genitori avevano aperto un negozio di alimentari nella cucina, ma non è durato a lungo.

“Vendevano anche le caramelle?”. Chiedevo loro curioso.

“Caramelle, cioccolato, zuccherini, pasticche di zucchero d'orzo...!”.

“Orca, e perché non c'è più?”.

“Perché il sole che le batteva contro ha liquefatto ogni cosa!”.

Il fatto reale è che solo mio nonno, il Gobbo, sapeva leggere e scrivere in quella famiglia, ma lui andava a lavorare da bracciante nelle campagne circostanti, laddove si poteva trovare qualche lavoretto da sbrigare, a casa rimaneva mia nonna Adele coi bambini piccoli che non erano di alcun aiuto, anzi, doveva sorvegliarli altrimenti andavano attorno alle caramelle e si riempivano le tasche.

Lei non sapeva fare i conti e né leggere e scrivere, e inoltre non si ricordava mai di chi le diceva:

“Segnate Adele, che adesso i soldi non li ho con me, ve li porto domani quando ripasso!”.

E ce n'erano che non si facevano più vedere e lei non ricordava di chi era venuto a far spesa e da chi doveva riscuotere i soldi.

La sua specialità era castrare i galletti, quando andava da Filippi a fare i capponi, mi prendeva con sé e prima di venire a casa mi faceva mangiare i testicoli, le creste e i bargigli che aveva reciso a quei poveri animali e che poi aveva cotto in umido, persuasa che così io sarei cresciuto forte e robusto e non come quel suo povero marito che da bambino era stato colpito da malattie infantili che gli avevano lasciato una brutta gobba sulla schiena e quella malformazione era diventato il soprannome che la gente di allora gli aveva affibbiato.

In quei tempi non ti perdonavano un difetto fisico, così il Gobbo divenne il suo nome fino all'ultimo dei suoi giorni, si chiamava Giovanni, ma se l'erano dimenticato quasi tutti.

(Continua)