di Piero Maroni  

DALL' ALBUM DI FAMIGLIA

Sivio, e' mi ba

Quant che la Gusteina, la su ma, la j era gròsa 'd leu d'un paèra 'd mois,

ui muret dò fioli, ona drì claèlta, e insen sa lòu u s'n'andet ènca e' savòi e e' surois,

l'an ragiunaèva piò, la j era andaèda vì 'd tèsta e cmè una persa la j andeva 'd nòta

a zarcaè al fioli 't i cantir aré, e' su maroid drì s'un lumòin e par ardeusla l'era 'na lòta.

Mo guasi par miraècval, la faset in temp a d'arciapaès pròima che e' fiol e nases,

quèl e fot l'eutum, acsè ma leu la i det tot i voizi e sempra s'la paveura ch'ui mures.

La i laseva faè inquèl e par quèst e vnet sò un desqual ch'un si e la feva a sbat,

l'è ròbi ch'as pò capoi, la i vlòiva un ben che s'la l'aves pers, la finoiva dreta 't i mat.   

Duvò ch'e pasaèva leu l'era cmè se fos pas la tempèsta, u j era sempra dan e guai,

u n'avòiva sudiziòun 'd niseun e cla pora dòna l'an gna la feva a curèz i su sbai.

L'era sèch spaènt, tot narvet, svelt cmè la pòrbia, senza paveura, propi un fulèt.

I m'à racòunt d' una volta che par tegna s'la su ma, u s'era rapaé sòura i cop de' casèt

e li la rugeva:-Fanòin, Fanòin, cor, che burdèl e vo buté zò na preda 't e' camòin!

A faè di dloid u n'avòiva òsi, int la stasòun di combar l'era e' spavent di cuntadòin,

quest i j avòiva pjint par vendi si marché e ciapè un po' 'd suld ch'in n'avdòiva l'òura,

mo leu, s'un su amoigh, l'aspitaèva che pases la camiunèta di combar, par saltèi sòura,

e pu uin tireva un po' ma l'amoigh, quei ch'u n'i ciapaèva is sbrandlaèva s'la straèda,

ste fat l'à duré un bèl po', fena che e' padròun di combar, quant ch'l'era 't la cuntraèda,

us farmaèva, e s-ciandòiva e ui deva eun gròs par faèi staè bun e ch'il lases in paèsa.

Sèl ch'us putòiva faè sa leu? E' ba tot i dè a lavuraè in zoir, la ma a pienz ma caèsa.

U n'è ch'i fases sti dispet par la faèna o par la gòula, na, na, propi pr'e' gost 'd daè dan,

j andeva 'd nòta a ròmp i combar snò pr'e' gost 'd faè rabié la zenta e fèi faè de' malan,

e cla volta ch'e santet un cuntadòin sburòun a doi che ma leu i combar in gni rubeva,

che 'd nòta e steva 'd guaèrdia s'la s-ciòpa e cmè ch'l'avdòiva un'òmbra, ui tireva.

Adès u j era gost, us s'l'era sgneda quèsta, ui i vlòiva faè vdòi sèl ch'l' era bon 'd faè,

e ma che por sgrazié u ni guastet snò i combar, ui rubet ènca la s-ciòpa par faèl danaè.

Drì la beusa de' stabi spèsa la caèsa d'un cuntadòin che steva presapoch int chi paraz,

u j era 'na pienta sa dal pòiri ch'l'era 'na buntà, ma Sivio, che alòura l'era un burdlaz,

ai li feva 'na gòula, mo una gòula ch'u s'li saria magnedi toti, mo al n'era al su però,

e' padròun u j avòiva det ch'e putòiva to quèli ch'al cascaèva matèra, mo quèli snò!

Leu alòura da caèsa su e tireva dal gran sasaèdi int cla pienta e ul feva tot al sòiri,

e' dè dòp l'andeva a là e cmè se gnent e fos e:- A pòs andaè vdòi s'l'è chesch al pòiri?

- Mo s' ta i ci andaè ènca ir? Ah, va pu, mo t'avdiré ch'an gn'è, u n'è sempra fèsta!

Quant che però u l'avdòiva turnaè indrì s'al pòiri int la sunaèda e scruleva la tèsta,

un gnela feva a capoi cmè che putòiva ès che tot i dè e casches tot cal pòiri acsè.

Mo j an i pasaèva svilt e u n'era piò e' temp 'd faè e' biricòin, bsugneva daès da faè

e truvaè un lavòur parchè e' fundarnòin ch'e lavoraèva e' su ba sòta padròun,

u n'era sa gnenca par daè da magné m'una fameja acsè znina, quèsta la quis-ciòun.

Un lavòur ul truvet da “E' Chel”, duvò ch'us feva d'inquèl: fabar, mecanich, stagnòin,

t'imparivi un imstir ch'e putòiva vnì bon 'la voita parchè t'savivi faè un sach 'd piciòin.

A lavuraè sa leu u j era un ragaz curiòus, ad sòuranum “Guardaènzil” il ciamaèva,  

l'avòiva un difèt me' còl ch'ui feva tnòi sempra la tèsta d'in zò, acsè i racuntaèva

che quant ch'e pasaèva j aparegg, par fèi vdòi, il tnòiva in deu e i l'arburtaèva d'indrì.

Beda ch'la n'era bona la zenta d'alòura, s't'avivi un difèt, par sempra ta te purtivi drì.

L'avanzet a lavuraè a lè fena ch'u n'arivet la ciamaèda pr'andaè a faè e' suldaè,

adès la voita la s'feva deura e e ciapet dal malatì ch'ai li durarà fena ch'la campaè.

Silvio, il mio babbo

Quando Agostina, sua mamma, era incinta di lui di un paio di mesi,

le morirono due figlie, una dietro l'altra, e con loro sparì anche il senno e i sorrisi,

non connetteva più era impazzita e fuori di sé, andava a cercare le sue figlie di notte,

nei campi arati e il marito dietro con un lumino e per trattenerla erano lotte.

Ma quasi per un miracolo, fece in tempo a riprendersi prima che il figlio nascesse,

quello fu l'ultimo nato, così gli diede tutti i vizi e sempre timorosa che le morisse.

Tutto gli permetteva e per questo ne sortì un discolo che a contenere non si riusciva,

la si poteva capire, gli voleva un bene che se lo avesse perduto, nel manicomio finiva.

Dove passava lui era come se fosse passata la tempesta, erano sempre guai e danni,

non aveva soggezione di alcuno e quella povera donna  nulla poteva coi suoi affanni.

Era magrissimo, tutto nervi, svelto come la polvere e senza alcuna paura, un folletto.

Si racconta di una volta che per stizza con sua mamma, era salito sul tetto,

lei urlava:-Giuseppe, corri, quel bambino vuole gettare una tegola giù nel camino!

Per i guai era portato, nel tempo dei cocomeri era l'incubo di qualche contadino,

li coltivavano per venderli sui mercati e di fare un po' di soldi non ne vedevano l'ora,

lui e un amico, aspettavano il passaggio del furgone dei cocomeri, gli saltava sopra

e ne gettava alcuni all'amico, quelli che non afferrava si frantumavano sulla strada,

sto fatto è durato un po', finché il padrone dei cocomeri quand' era nella contrada,

si fermava, scendeva, gliene dava uno grosso per placarli e poter in pace  transitare.

Cosa fare? Il padre tutto il giorno al lavorare e la mamma a piangere al casolare.

Non che i dispetti fossero per la fame o per gola, no, solo per il vizio di fare danno,

rovinava i cocomeri per il gusto di fare arrabbiare la gente e procurare malanno,

e una volta che udì un contadino dire che a lui i cocomeri non glieli rubava,

perché la notte stava di guardia col fucile e come vedeva un'ombra, le sparava,

ora sì che c'era gusto, se l'era segnata, gli voleva mostrare ciò che lui sapeva fare,

e a quel tale non rovinò solo i cocomeri, gli rubò anche il fucile per farlo dannare.

Vicino al letamaio dietro la casa di un contadino che abitava in quel distretto,

cresceva una pianta con delle pere che erano una bontà, a Silvio, allora ragazzetto,

facevano voglia, ma una voglia che se le sarebbe mangiate tutte, non erano sue però,

il padrone gli aveva detto che poteva prendere solo quelle cadute a terra, le altre no!

Lui allora da casa sua tirava tante sassate in quella pianta, e lo faceva tutte le sere,

il giorno dopo andava lì come se niente fosse e:- Posso vedere se ci sono le pere?

-Ma ci sei andato ieri sera? Va pure, ma vedrai che non ci sono, mica è sempre festa!

Quando lo vedeva ritornare con le pere sul braccio, perplesso dondolava la testa

e non riusciva a capire come tutti i giorni le pere potessero così tante cascare.

Gli anni correvano veloci e non era più tempo di birichinate, occorreva darsi da fare

e trovare un lavoro perché il poderino che lavorava suo babbo per il padrone,

non bastava neanche per sfamare una famiglia così piccola, questa la questione.

Trovò lavoro da “Paglierani”, dove si faceva di tutto: fabbro, meccanico, stagnino,

imparavi un mestiere che poteva servirti per la vita perché sapevi fare ogni lavorino.

A lavorare con lui c'era uno strano ragazzo:“Guardaincielo” era soprannominato,

aveva un difetto al collo che lo obbligava a tenere giù la testa, così si è raccontato

che per mostrargli gli aerei in volo, lo prendevano in due e lo ribaltavano.

Non era gentile la gente di allora, se avevi un difetto, per sempre te lo ricordavano.

Vi rimase a lavorare fino a che non arrivò la cartolina per andare a fare il militare,

ora la vita diventava dura, fu lì che contrasse malattie per tutto il tempo da campare.